Այսօր հայկական մշակութային երկնակամարից պոկվեց ևս մեկ պայծառ աստղ։ Ցուրտ հունվարյան երեկոն մեզ բերեց գուժկան մի լուր, որին դժվար է հավատալ․
Կյանքից հեռացել է սիրված դերասանուհի, հաղորդավարուհի և ասմունքի վարպետ Զառա Արամյանը։
Նրա հեռանալը սոսկ ֆիզիկական կորուստ չէ, դա մի ամբողջ դարաշրջանի, գեղագիտական մի տեսակի և «արամյանական» մեծ ավանդույթի լռությունն է։
Զառա Արամյանի կյանքը հեշտ չի եղել, թեպետ կողքից թվացել է, թե Մեծն երաժիշտ Ֆելիքս Արամյանի դուստրը լինելը միայն առավելություն է։
Իրականում, սակայն, դա մի հսկայական պատասխանատվություն էր, ծանր մի խաչ, որը նա կրեց ամենայն արժանապատվությամբ ու նրբագեղությամբ։
Նա չփորձեց կրկնել հորը, նա չփորձեց մնալ նրա ստվերում։
Զառան կերտեց իր սեփական կերպարը՝ կանացի, խորը, ինտելեկտուալ և անսահման հուզական։
Նրա մեջ միախառնված էին հորից ժառանգած խարիզման և սեփական ինքնատիպ քնքշությունը։
Այսօր, երբ նա հեռացավ երկրային կյանքից, մխիթարանքը մեկն է՝ նա գնում է հանդիպելու իր կարոտին։ Երկնային բեմում այսօր հանդիպում են Հայր և Դուստր։
Զառա Արամյանը ընդամենը վերջերս իր հարցազրույցներից մեկում շատ հետաքրքիր և ուշագրավ մանրամասներ էր ներկայացրել կապված առողջական խնդրի հետ։
Պարզվում է, որ նա, տեսականորեն կարող էր փրկվել։
Խոսելով իր վիճակի և եթերից բացակայելու մասին, Զառան անկեղծացել էր ասելով՝
«Անկեղծ լինեմ, ինձ համար էլ է շատ բարդ, որովհետև կյանքիս շատ կարևոր հատված՝ մոտ 35 տարի, շատ ակտիվ եթերում եմ եղել:
Այնպես ստացվեց, որ հիմա չեմ կարողանում լինել եթերում:
Ե՛վ բարդ է, և՛ մյուս կողմից էլ մտածում եմ, որ վաղ թե ուշ պետք է թողնել եթերը, որովհետև մեր երիտասարդներն ավելի լավն են, ազատածին են, կիրթ ու կրեատիվ են»,- նշել էր հաղորդավարուհին:
Առողջական լուրջ խնդիրներ և ճակատագրական որոշում։
Ցավոք, եթերային դադարի հիմնական պատճառը ոչ միայն սերնդափոխությունն է, այլև կյանքի համար վտանգավոր առողջական վիճակը։ Զառա Արամյանը խոստովանել է, որ սրտի հետ կապված լուրջ խնդիրներ ունի, որոնք պահանջում են արմատական միջամտություն, սակայն ինքը կայացրել է իր որոշումը։
—«Սրտի հետ կապված առողջական լուրջ խնդիրներ ունեմ և շատ բարդ շրջան եմ անցնում:
Կարող է օգնել միայն սրտի փոխպատվաստումը, բայց ես դրան չեմ գնա:
Ինչքան շնորհել է Աստված, այդքան էլ կապրեմ: Ջանում եմ, որ ապրեմ բարի և արժանապատիվ»,– ասել է նա:
Պայքար՝ սրացումից սրացում։
Հաղորդավարուհին նշել էր, որ խնդիրը վերջնական լուծում չունի և կրում է պարբերական բնույթ։ Սուր վիճակների ժամանակ նա դիմում է բժշկական օգնության՝ վստահելով իր բժշկին՝ Խաչիկ Համբարձումյանին։
«Սուր վիճակն անցնում է, մինչև սկսվում է հաջորդ սուր վիճակը»,- եզրափակել է Զառա Արամյանը:
Չնայած առողջական ծանր փորձություններին՝ սիրված հաղորդավարուհին պահպանում է արժանապատվությունը և կյանքի նկատմամբ փիլիսոփայական մոտեցումը։
Ցավոք, նա այօր լքեց երկրային կյանքը՝ բռնելով հավերժի ուղին։